10 yilgacha qamoq: O‘zbekistonda ekstremizmga qarshi kurash choralari kuchaytiriladi
Ekstremistik materiallarni tayyorlash yoki tarqatish maqsadida saqlash, shuningdek, taqiqlangan tashkilotlar ramzlarini tarqatish uchun jarima yoki ma’muriy qamoq jazosi qo‘llanishi mumkin.
O‘zbekistonda ekstremizmga qarshi kurashish samaradorligini oshirish maqsadida ayrim qonun hujjatlariga o‘zgartirish va qo‘shimchalar kiritildi. Bu haqda Adliya vazirligi ma’lum qildi.
2026-yil 2-noyabrdagi O‘RQ–1185-son qonun bilan Jinoyat kodeksiga kiritilgan qo‘shimchalarga ko‘ra, ekstremistik, separatistik, fundamentalistik yoki boshqa taqiqlangan tashkilotlarda ishtirok etish 5 yildan 10 yilgacha ozodlikdan mahrum qilish bilan jazolanadi.
Ma’muriy javobgarlik to‘g‘risidagi kodeksga kiritilgan o‘zgartirishlarga ko‘ra, ekstremizm, separatizm yoki aqidaparastlik g‘oyalari bilan yo‘g‘rilgan, qirg‘in solishga, fuqarolarni zo‘rlik bilan ko‘chirishga da’vat etadigan yoki aholi orasida vahima chiqarishga qaratilgan materiallarni tayyorlash yoxud tarqatish maqsadida saqlash uchun javobgarlik belgilanmoqda.
Shuningdek, ekstremistik va terrorchilik tashkilotlarining atributlari yoki ramziy belgilarini tarqatish yoxud namoyish etish maqsadida tayyorlash va saqlash ham jazolanadi.
Bunday huquqbuzarliklar uchun huquqbuzarlik ashyosini musodara qilgan holda:
-
fuqarolarga BHMning 50 baravaridan 100 baravarigacha;
-
mansabdor shaxslarga BHMning 100 baravaridan 150 baravarigacha jarima solinishi yoki 15 sutkagacha ma’muriy qamoq jazosi qo‘llanishi mumkin.
Bundan tashqari, qonun hujjatlaridagi “diniy ekstremizm” iborasi “ekstremizm” so‘zi bilan almashtirildi.
Qonun rasmiy e’lon qilingan kundan e’tiboran kuchga kiradi.
