Shvetsiya ish beruvchilari o‘zbekistonlik kadrlarga qiziqmoqda: qaysi sohalarga talab bor?
Kadrlar yetishmayotgan shimoliy hududlarida o‘zbekistonlik kadrlarni tayyorlash va ishga jalb etish masalasi muhokama qilindi.
Shvetsiya ish beruvchilari o‘zbekistonlik mutaxassislarni tibbiyot, qishloq xo‘jaligi va iqtisodiyotning boshqa tarmoqlariga ishga jalb etishga qiziqish bildirmoqda. Bu haqda “Dunyo” axborot agentligi xabar berdi.
Ma’lum qilinishicha, 13-noyabr kuni Stokgolm shahrida “O‘zbekiston — Shvetsiya: ko‘nikmalar, iste’dodlar va mehnat migratsiyasi” mavzusida forum bo‘lib o‘tdi. Tadbir O‘zbekistonning Shvetsiyadagi elchixonasi ko‘magida Migratsiya agentligi tomonidan tashkil etildi.
Unda Migratsiya agentligi direktori Muhsinxo‘ja Abdurahmonov va Kasbiy ta’lim agentligi direktori Azimjon Xusanov boshchiligidagi O‘zbekiston delegatsiyasi, Shvetsiya davlat idoralari, ish beruvchilar, rekruting kompaniyalari hamda diaspora vakillari ishtirok etdi.
Forumning ochilish marosimida O‘zbekiston elchisi Rahmatulla Nurimbetov, Shvetsiyaning O‘zbekistondagi elchisi Martin Rozen va Shvetsiya Migratsiya xizmatining O‘zbekiston bo‘yicha loyiha rahbari Gabriela Furtado so‘zga chiqdi.
Martin Rozen O‘zbekistonning iqtisodiy taraqqiyotini yuqori baholab, mamlakatni Markaziy Osiyoda Shvetsiyaning istiqbolli hamkorlaridan biri sifatida qayd etdi. Uning ta’kidlashicha, mehnat migratsiyasi ikki tomonlama munosabatlarning muhim yo‘nalishlaridan biriga aylanmoqda.
Gabriela Furtado shved ish beruvchilari va rekruting agentliklarini O‘zbekiston bilan aloqalarni faollashtirishga chaqirdi. Shuningdek, u qonuniy va uyushgan mehnat migratsiyasini rivojlantirish borasidagi davlat siyosatining ahamiyatini ta’kidladi.
Muhsinxo‘ja Abdurahmonov O‘zbekistonning kadrlar salohiyati, yevropalik ish beruvchilar talablariga mos mutaxassislarni tanlash mexanizmlari hamda migratsiya siyosatidagi islohotlar haqida ma’lumot berdi.
Azimjon Xusanov esa kasbiy ta’lim tizimi, shved ish beruvchilari va ta’lim muassasalari bilan hamkorlik, jumladan, qo‘shma dasturlar asosida mutaxassislar tayyorlash hamda ularning malakasini Shvetsiya standartlariga moslashtirish imkoniyatlari haqida so‘z yuritdi.
Forumda Shvetsiya korxonalari konfederatsiyasi, Fermerlar federatsiyasi, “yashil” ish beruvchilar birlashmasi, “IKEM” tashkiloti, Shvetsiyaning Yevroosiyo bo‘yicha savdo palatasi hamda “OnePartnerGroup” va “Incluso” rekruting kompaniyalari vakillari qatnashdi. Norvegiyaning “QM Software” tashkiloti vakillari ham tadbirda ishtirok etdi. Ular iqtisodiyotning turli tarmoqlariga o‘zbekistonlik xodimlarni jalb etishdan manfaatdor ekanini bildirdi.
Muloqot davomida Shvetsiyaning shimoliy hududlari, jumladan, saamlar istiqomat qiladigan va kadrlar tanqisligi kuzatilayotgan hududlar vakillari ham hamkorlikka qiziqish bildirdi.
Xususan, tibbiyot xodimlariga ehtiyoj yuqoriligi sababli o‘zbekistonlik hamshiralarni tayyorlash dasturida ishtirok etish masalalari muhokama qilindi.
