Sud qaroridan keyin ham foiz hisoblagan banklar pulni qaytaradi: Markaziy bank talabi
Tijorat banklari noqonuniy undirilgan kredit foizlari va jarimalarni qarz oluvchilarga qaytarishi shart.
O‘zbekistonda kredit qarzini undirish bo‘yicha sudning hal qiluv qarori chiqarilganidan keyin banklar qarorida ko‘rsatilgan summaga qo‘shimcha foiz, jarima yoki penya hisoblashni to‘xtatishi kerak. Agar ushbu talab buzilib, qarz oluvchilardan ortiqcha mablag‘ undirilgan bo‘lsa, ular qaytarilishi lozim. Bu haqda Markaziy bank ma’lum qildi.
Fuqarolik kodeksining 744-moddasi uchinchi qismiga muvofiq, kredit qarzini undirish to‘g‘risida sudning hal qiluv qarori chiqarilganidan so‘ng, qarorda ko‘rsatilgan undiriladigan summaga foiz va jarima (neustoyka) yoki penya hisoblash to‘xtatiladi.
Markaziy bank Bank nazorati qo‘mitasining qarori bilan tijorat banklari kuzatuv kengashlari va boshqaruvlari zimmasiga ushbu talabga to‘liq rioya etilishini ta’minlash vazifasi yuklatildi.
Shuningdek, banklarning ichki audit xizmatlari 2026-yil 10-dekabrgacha sud qarori chiqarilgan kreditlar bo‘yicha foiz va jarimalar hisoblanishi to‘xtatilganini tekshirishi kerak. Aniqlangan qonunbuzilishlar bank kuzatuv kengashi va boshqaruvi muhokamasiga kiritilishi lozim.
Qonunga zid ravishda hisoblangan foiz va jarimalar bekor qilinishi, avval undirilgan mablag‘lar esa qisqa muddatda qarz oluvchilarga qaytarilishi shart.
Banklar amalga oshirilgan ishlar va qaytarilgan mablag‘lar to‘g‘risidagi batafsil hisobotni tasdiqlovchi hujjatlar bilan birga 2026-yil 25-dekabrgacha Markaziy bankka taqdim etishi lozim.
