Namanganda MIB fermerdan 670 mln qarzdorlik undirdi
Ijro hujjatiga ko‘ra, fermer xo‘jaligidan elektr taʼminotchi korxonasi foydasiga 670 mln so‘m undirish belgilangan.
Majburiy ijro byurosi Namangan viloyat boshqarmasi va Pop tuman bo‘limi tomonidan elektr energiyasidan foydalanish bilan bog‘liq qarzdorliklarni undirish borasida ijro harakatlari izchil davom ettirilmoqda.
Xususan, bo‘lim ish yurituviga kelib tushgan ijro hujjatiga asosan, fermer xo‘jaligining elektr taʼminoti korxonasi oldidagi qarzdorligini undirish choralari ko‘rildi.
Olib borilgan ijro harakatlari natijasida fermer xo‘jaligidan elektr energiyasi uchun yuzaga kelgan salkam 670 million so‘m qarzdorlik to‘liq undirilib, elektr taʼminotchi korxonasi hisob raqamiga o‘tkazilishi taʼminlandi.
Mazkur ijro harakati elektr energiyasi uchun to‘lov intizomiga rioya etish, mavjud qarzdorliklarni o‘z vaqtida bartaraf etish hamda iqtisodiy munosabatlarda qonuniylikni taʼminlash muhim ahamiyatga ega ekanini yana bir bor ko‘rsatadi.
Taʼkidlash joizki, Majburiy ijro byurosi Namangan viloyat boshqarmasi va uning hududiy bo‘limlari tomonidan sud va boshqa vakolatli organlar hujjatlari ijrosini taʼminlash, undiruvchilarning qonuniy manfaatlarini himoya qilish hamda ijro hujjatlari bo‘yicha qarzdorliklarni undirish yuzasidan amaliy ishlar davom ettirilmoqda.
