Jismoniy shaxslar va kompaniyalar bankrotligi: endi maxsus agentlik kuzatib boradi
Maxsus agentlik jismoniy shaxslar va tashkilotlarning to‘lovga qobiliyatsizligi jarayonlarini nazorat qiladi.
O‘zbekistonda jismoniy shaxslar va tashkilotlarning to‘lovga qobiliyatsizligi bilan bog‘liq ishlarni tartibga solish va nazorat qilish bo‘yicha maxsus agentlikning huquqiy maqomi belgilandi.
Hukumatning 2026-yil 11-noyabrdagi 616-son qarori bilan Adliya vazirligi huzuridagi To‘lovga qobiliyatsizlik ishlari agentligi to‘g‘risidagi nizom tasdiqlandi.
Mazkur nizom agentlikning maqomi, asosiy vazifalari, funksiyalari, huquq va majburiyatlari hamda faoliyatini tashkil etish tartibini belgilaydi.
Agentlikning asosiy vazifalari qatoriga to‘lovga qobiliyatsizlik sohasida davlat siyosatini amalga oshirish, ushbu yo‘nalishni nazorat qilish va tartibga solish kiradi. Shuningdek, davlat organlari va tashkilotlari faoliyatini muvofiqlashtirish ham uning zimmasiga yuklatilgan.
Bundan tashqari, agentlik to‘lovga qobiliyatsizlik jarayonlarini to‘liq raqamlashtirish, ortiqcha byurokratik tartib-taomillarni soddalashtirish hamda sud boshqaruvchilari faoliyatini tashkil etish va nazorat qilish bilan shug‘ullanadi.
Shuningdek, jismoniy shaxslarning to‘lovga qobiliyatsizligi bo‘yicha hisob va tahlil yuritish ham agentlikning asosiy vazifalaridan biri hisoblanadi.
Agentlikka Prezident tomonidan lavozimga tayinlanadigan va lavozimidan ozod etiladigan adliya vaziri o‘rinbosari — To‘lovga qobiliyatsizlik ishlari agentligi direktori rahbarlik qiladi.
