Namanganda noqonuniy dori ombori fosh etildi: 23 mingdan ortiq dori topildi
Ularning dastlabki qiymati 3,3 milliard so‘mdan oshadi.

Namangan shahrida yashovchi fuqaro o‘z xonadonida yashirin ombor tashkil etib, sifati kafolatlanmagan dori vositalarini saqlab kelgani aniqlandi.
Davlat xavfsizlik xizmatining Namangan viloyati bo‘yicha boshqarmasi Bojxona, Ichki ishlar va Milliy gvardiya xodimlari bilan hamkorlikda Yangi Namangan tumanidagi “Mingterak” mahallasida joylashgan xonadonda tekshiruv o‘tkazdi.
Natijada, xonadondan xorijda ishlab chiqarilgan 156 turdagi dori vositasi topilgan. Ularning umumiy soni 23 432 donani tashkil etib, dastlabki hisob-kitoblarga ko‘ra, qiymati 3,3 milliard so‘mdan oshadi.
Ma’lum qilinishicha, ushbu dori vositalari mamlakatimizga noqonuniy olib kirilgan.
Hozirda kontrafakt ekani gumon qilinayotgan preparatlar protsessual tartibda olib qo‘yilib, ularning xususiyatlarini aniqlash uchun ekspertiza tayinlangan. Holat yuzasidan tergovga qadar tekshiruv ishlari davom etmoqda.








