Toshkentning ayrim hududlarida gaz ta’minoti to‘xtatiladi: qaysi manzillarda va qachongacha?
Tumanlarda gaz quvurlarini xavfsiz hududga ko‘chirish ishlari yakunlangach, bosqichma-bosqich qayta tiklanadi.

17-noyabr kuni Mirzo-Ulug‘bek va Yunusobod tumanlarida gaz quvurlarini xavfsiz hududga ko‘chirish ishlari olib borilishi munosabati bilan ayrim manzillarda tabiiy gaz ta’minoti vaqtincha to‘xtatildi. Bu haqda “Hududgaz Poytaxt” matbuot xizmati xabar berdi.
Mirzo-Ulug‘bek tumani
Tumanning “Asaka” mahallasidagi Mahatmagandi ko‘chasida qurilish ishlari olib borilayotgani sababli yer ustidan o‘tgan o‘rta bosimli gaz quvuri xavfsiz hududga ko‘chiriladi.
Shu munosabat bilan 17-noyabr kuni soat 10:00 dan 17:00 ga qadar “Asaka” mahallasining Mahatmagandi va Asaka ko‘chalarida gaz ta’minoti to‘xtatiladi.
Uzilish 430 ta xonadon, 9 ta ko‘p qavatli uydagi 480 ta xonadon hamda 7 ta ulgurji iste’molchiga ta’sir qiladi.
Yunusobod tumani
Tumanning “Shayx Shivli” mahallasi, Shibliy ko‘chasida joylashgan o‘rta bosimli gaz quvuri ham xavfsiz hududga ko‘chiriladi. Shu sababli 17-noyabr kuni soat 10:00 dan 18:00 ga qadar quyidagi hududlarda gaz ta’minoti vaqtincha to‘xtatiladi:
-
“Yangi Tarnov”, “Shivli” va “Firdavsiy” mahallalaridagi 350 ta xonadon;
-
“Buyuk Turon” mahallasi, Barokko ko‘chasidagi ko‘p qavatli uyning 250 ta xonadoni;
-
“M. Ulug‘bek” mahallasi, 2-tor Osiyo ko‘chasidagi 120 ta xonadon;
-
“Firdavsiy” mahallasidagi “Minor Stroy” ko‘p qavatli uyining 160 ta xonadoni;
-
“Firdavsiy” mahallasi, QHAY ko‘chasidagi 26-uyda joylashgan 120 ta xonadon;
-
“Uvaisiy”, “Yurtobod” va “Shoshtepa” mahallalarining 19-dahasidagi 38 ta ko‘p qavatli uyning 3 200 ta xonadoni;
-
“Beg‘ubor” mahallasidagi 54-uyda joylashgan 80 ta xonadon.
Shuningdek, “Buyuk Turon” va “M. Ulug‘bek” mahallalaridagi “Mahalla-90” kafesi, “Zebu Zar” to‘yxonasi, “Sadoba” kafesi va yana 12 ta ulgurji iste’molchida ham gaz ta’minoti vaqtincha to‘xtatiladi.
“Hududgaz Poytaxt” ma’lumotiga ko‘ra, ishlar yakunlangach, iste’molchilar ogohlantirilib, tabiiy gaz ta’minoti bosqichma-bosqich qayta tiklanadi.








