Ўзбекистон мобил интернет тезлиги бўйича МДҲда учинчи ўринни эгаллади
“Speedtest Global Index” нашри 2025 йил июн ҳолатига кўра интернет тезлиги бўйича дунё рейтинги натижаларини эълон қилди.
Унга кўра, Ўзбекистон мобил интернет тезлиги бўйича 103 давлат орасида 71-ўринни эгаллади. Мамлакатда ўртача мобил интернет тезлиги 55,78 Мбит/секундни ташкил қилган. Бу кўрсаткич билан Ўзбекистон Мустақил Давлатлар Ҳамдўстлиги (МДҲ) давлатлари орасида Қозоғистон ва Россиядан сўнг, учинчи ўринга жойлашди.
Дунё миқёсида эса биринчи ўринни Бирлашган Араб Амирликлари (546,14 Мбит/секунд) эгаллади. Иккинчи ўринда Қатар (517,44 Мбит/секунд), учинчи ўринда эса Қувайт (378,45 Мбит/секунд) қайд этилган.
Кучли ўнликка шунингдек Баҳрайн, Бразилия, Болгария, Жанубий Корея, Хитой, Саудия Арабистони ва Дания каби давлатлар ҳам кирган.
Рейтингнинг энг паст поғоналарида эса Эсватини (18,36 Мбит/сек, 101-ўрин), Беларусь (17,97 Мбит/сек, 102-ўрин) ва Боливия (13,19 Мбит/сек, 103-ўрин) жой олган.
