Тақиқловчи сигналга қарамади: Сурхондарёда Spark поезд билан тўқнашди
Ҳайдовчиси тақиқловчи светофор сигналига қарамай, темир йўл кесишмасидан ўтишга уринган.
2026 йил 9 ноябрь куни соат 02:55 да Сурхондарё вилоятидаги Термиз – Ғалаба темир йўл участкасида Spark русумли автомобиль йўловчи поезди билан тўқнашди. Ҳодиса оқибатида автомобиль ҳайдовчиси тан жароҳати олмаган.
«Ўзбекистон темир йўллари» АЖ маълум қилишича, тўқнашув Термиз – Ғалаба бекатлари оралиғининг 5-километр, ПК-2 қисмида жойлашган қўриқланадиган темир йўл кесишмасида содир бўлган.
Ғалаба – Термиз йўналишида ҳаракатланаётган 3601-сонли йўловчи поезднинг бешинчи вагонига давлат рақами 75 J 911 ZA бўлган оқ рангли Spark автомобили келиб урилган.
Хабарларга кўра, ЙТҲ ҳайдовчининг темир йўл кесишмаларидан ўтиш қоидаларини қўпол равишда бузиши оқибатида юзага келган. У светофорнинг тақиқловчи сигналига ва огоҳлантирувчи овозли сигнал ишлаб турганига қарамай, кесишмадан ўтишга уринган.
Ўрганиш давомида темир йўл кесишмасидаги сигнал белгилари тегишли йўриқнома талаблари асосида ўрнатилгани, соз ҳолатда ишлаётгани ҳамда кесишма ёритиш тизими билан таъминлангани аниқланган.
Шунингдек, кесишманинг техник ҳолати текширилганда, барча тегишли қурилма ва жиҳозлар соз экани қайд этилган.
