Автобусда номақбул мусиқа қўйилди: ҳайдовчиларга тушунтириш берилмоқда
“Тошшаҳартрансхизмат” автобусдаги ҳолат юзасидан муносабат билдирди.
Тошкент шаҳридаги 61-сонли автобус салонида жамоат жойида эшитилиши номақбул бўлган мусиқа қўйилгани акс этган мурожаат ижтимоий тармоқларда тарқалди.
Мазкур ҳолат юзасидан «Тошшаҳартрансхизмат» АЖ маълумот берди.
Қайд этилишича, «Янгиобод» автобус саройида 61-сонли йўналиш ҳайдовчилари билан қўшимча йўриқнома ўтказилмоқда.
Унда ҳайдовчиларга автобус салонида баланд овозда мусиқа қўймаслик, йўловчиларга ноқулайлик туғдирмаслик, йўл ҳаракати қоидаларига қатъий риоя қилиш ҳамда хизмат интизомига амал қилиш бўйича тушунтиришлар берилмоқда.
Компания келгусида бундай ҳолатларга йўл қўймаслик ва йўловчиларга сифатли ҳамда маданиятли хизмат кўрсатиш зарурлигини таъкидлади.
