Туркияда афғонистонлик эркак собиқ хотинини тўрт фарзанди кўз ўнгида бўғиб ўлдирди

Туркиянинг Испарта шаҳрида 29 ёшли Афғонистон фуқароси Ҳайр Муҳаммед Раҳимий собиқ турмуш ўртоғи, 28 ёшли Фотима Раҳмонийни тўрт фарзанди — 3, 6, 8 ва 10 ёшли қизлари кўз ўнгида бўғиб ўлдирди. Воқеа Искендер маҳалласидаги хонадонда, кеча кечаси содир бўлган. Бу ҳақда Медятава нашри хабар берган.

Дастлабки маълумотларга кўра, эр-хотин тахминан бир йил аввал ажрашган бўлсада, яқинда яна бирга яшай бошлаган. Номаълум сабабларга кўра келиб чиққан жанжал чоғида Раҳимий собиқ рафиқасини бўғиб, ҳаракатсиз ҳолда қолдирган. Воқеа жойига етиб келган тез тиббий ёрдам ходимлари Фотима Раҳмонийни жонлантиришга ҳаракат қилган, аммо у касалхонада вафот этган.

Полиция Раҳимийни воқеа жойида қўлга олди. У бўлимда кўрсатма бергач, суд қарори билан ҳибсга олинган. Марҳуманинг тўрт фарзанди эса полиция ҳимоясига олинган ва хавфсиз жойга жойлаштирилган.

Воқеа бўйича тергов ишлари давом этмоқда. Маҳаллий жамоатчилик аёллар ўлими ва оилавий зўравонликка қарши кескин норозилик билдирмоқда, ҳуқуқ ҳимоячилари эса аёллар хавфсизлигини таъминлаш учун қўшимча чоралар кўришга чақирмоқда.