Қирғизистон собиқ президентининг оиласи уйдан мажбуран чиқарилди
Суд қарорига мувофиқ, собиқ президент Алмазбек Атамбаевнинг мол-мулки, жумладан, Қўй-Тошдаги уй мусодара қилинди.
Қирғизистон Давлат мулкини бошқариш агентлиги маълум қилишича, суд қарори асосида собиқ президент Алмазбек Атамбаевнинг оиласи яшаб келган Чуй вилоятининг Аламудин туманига қарашли Қўй-Тош қишлоғидаги уй ва ер майдони давлат тасарруфига қайтарилди. Собиқ президент Алмазбек Атамбаевнинг оиласи Қўй-Тош қишлоғидаги уйидан мажбуран чиқариб юборилмоқда.
Агентлик вакилларининг таъкидлашича, ушбу ҳудуд эндиликда ижтимоий эҳтиёжларга хизмат қиладиган объектларга ажратилади. Режаларга кўра, у ерда қариялар уйи ва болалар боғчаси қурилиши белгиланган.
Маълумот учун 2025 йил 3 июн куни Бишкек шаҳрининг Биринчи Май туман суди Алмазбек Атамбаевни 11 йил 6 ой муддатга озодликдан маҳрум қилиш ҳақидаги ҳукмни эълон қилган. Шу билан бирга, суд қарорига кўра, собиқ президентнинг бир қатор мол-мулклари, жумладан Қўй-Тошдаги уйи мусодара қилиниб, давлат мулкига ўтказилган.
Эслатиб ўтамиз, Алмазбек Атамбаев Қирғизистоннинг 2011–2017 йилларда давлат раҳбари бўлган. У президентликдан кетганидан кейин ҳам фаол сиёсий майдонда қолган ва турли жиноят ишларида гумонланувчи сифатида тилга олинган.
