Россия нефть заводларига зарбалар тўхтатилиши мумкин: Зеленский шартини айтди
Шунингдек, Украина АҚШдан Patriot ракеталарини бир ой муддатга етказиб беришни сўраган ва бунинг учун тўлов қилишга тайёрлигини билдирган.
Украина президенти Володимир Зеленский Россиядаги нефтни қайта ишлаш заводларига ҳужумларни тўхтатиш учун икки шартни илгари сурди. Бу ҳақда у Fox News телеканалига берган интервьюсида маълум қилди.
Зеленскийнинг айтишича, Россия Украина энергетика инфратузилмасига ҳужумларни тўхтатса, Киев ҳам Россия нефтни қайта ишлаш заводларига зарба беришни бас қилади. Яна бир муқобил вариант сифатида у АҚШдан Patriot ҳаво мудофаа тизимлари учун ракеталар етказиб беришни таклиф қилган.
Украина президенти АҚШ бир ой муддатга Patriot ракеталарини етказиб берса, Украина ҳам шу давр мобайнида Россия нефтни қайта ишлаш заводларига ҳужум қилмаслигини билдирган. Унинг таъкидлашича, Киев ракеталарни бепул ёрдам сифатида эмас, балки ўз маблағлари ҳисобидан сотиб олишга тайёр.
Зеленский ушбу масалани АҚШ президенти Дональд Трамп ва унинг жамоаси билан бир неча бор муҳокама қилганини ҳам қайд этган.
