Нетаньяху Трампни АҚШ сайловларидан кейин Эронга зарба беришга ундамоқда — Axios

 

АҚШ президенти Дональд Трамп Исроил бош вазири Биньямин Нетаньяху билан телефон орқали суҳбатлашди. Axios нашрининг хабар беришича, томонлар АҚШ ва Эрон ўртасидаги музокаралар ҳолати ҳамда ҳарбий ҳаракатлар қайта бошланиши мумкин бўлган вақтни муҳокама қилган.

 

Нашр манбаларига кўра, Нетаньяху Трампни 3 ноябрь куни АҚШда бўлиб ўтадиган оралиқ сайловлардан кейин Эронга қарши бомбардимонларни давом эттиришга ундамоқда.

 

Axios манбалари Трамп ҳозирча музокараларга имконият беришга мойил эканини билдирган. Бу ёндашув эса Исроил бош вазирини хавотирга солмоқда.

 

Нашрнинг қайд этишича, АҚШ президенти бир вақтнинг ўзида икки йўналишда ҳаракат қилмоқда: Эрон билан музокараларни қайта бошлашга уринмоқда ва шу билан бирга ҳарбий амалиётларни тиклашга тайёргарлик кўрмоқда. Axios бу ёндашув Трамп «Эпик ғазаб» операциясидан олдин ҳам қўллаган стратегиясига ўхшашини ёзган.

 

Аввалроқ The New York Times газетаси АҚШ ҳарбийлари Эронга қарши ҳарбий ҳаракатларни қайта бошлаш режаларини ишлаб чиқаётгани ҳақида хабар берган эди. Газета маълумотларига кўра, ҳарбий амалдорлар қисқа, аммо шиддатли операция ўтказишдан манфаатдор. Унинг эҳтимолий нишонлари қаторига Эроннинг ракета ва дрон арсенали ҳам кириши мумкин.

 

Шунингдек, нашр Миллий хавфсизлик кенгаши ва Пентагон вакиллари яқинда Трампга Эронга қарши операциялар бўйича бир нечта режани тақдим этгани, бироқ президент уларнинг барчасини рад этганини ёзган.