Қозоғистонга визасиз кириш ҳам янги тартибга ўтади: QazETA тизими жорий этилмоқда
Мамлакатга боришни режалаштирган чет элликлар 2027 йил 1 июлдан электрон кириш рухсатномасини олиши керак бўлади.
Қозоғистон 2026 йил 1 ноябрдан визасиз режим амал қиладиган мамлакатлар фуқаролари учун электрон кириш рухсатномаси — QazETA тизимини босқичма-босқич жорий эта бошлади. 2027 йил 1 июлдан бошлаб рухсатнома олиш мажбурий бўлади.
Қирғизистон Ташқи ишлар вазирлиги маълумотига кўра, янги тартиб Қозоғистон ҳукуматининг 2026 йил 10 октябрдаги қарорида белгиланган. Тизим Евроосиё иқтисодий иттифоқи давлатлари фуқароларини ҳам қамраб олади.
QazETA тизими қуйидаги муддатларда жорий этилади:
-
2026 йил 1 ноябрдан — Актау халқаро аэропорти ҳамда Урлютобе, Ауҳаттй, Атамекен ва Нурлй Жол автомобиль чегара ўтказиш пунктларида;
-
2027 йил 1 январдан — Остона ва Олмаота халқаро аэропортларида;
-
2027 йил 1 мартдан — давлат чегарасидаги бошқа барча назорат-ўтказиш пунктларида;
-
2027 йил 1 июлдан — электрон рухсатнома барча тегишли чет эл фуқаролари учун мажбурий бўлади.
2027 йил 30 июнгача давом этадиган ўтиш даврида рухсатномасиз ҳам Қозоғистонга кириш мумкин. Бу даврда чегарачилар саёҳатчиларни янги талаб ҳақида огоҳлантиради.
Электрон рухсатномани қандай олиш мумкин?
QazETA рақамли платформаси орқали рухсатнома олиш учун бепул ариза топшириш мумкин. Ариза мамлакатга кириш режалаштирилган санадан камида 72 соат олдин юборилиши керак.
Рухсатнома 180 календарь кун давомида амал қилади. Бироқ Қозоғистонда бўлишнинг рухсат этилган муддати ўзгармайди ва амалдаги миграция қоидалари билан белгиланади. Чегарадан ўтишда ариза топширишда фойдаланилган паспорт ёки бошқа шахсни тасдиқловчи ҳужжат тақдим этилиши лозим.
Янги талаб 29 тоифадаги чет элликларга татбиқ этилмайди. Улар орасида 16 ёшгача бўлган болалар, 65 ёш ва ундан катта шахслар, Қозоғистонда яшаш ёки вақтинчалик яшаш рухсатномасига эга бўлганлар ҳамда аэропортнинг халқаро транзит ҳудудидан чиқмайдиган йўловчилар бор.
Қирғизистон Ташқи ишлар вазирлиги электрон рухсатнома мамлакатга киришни автоматик равишда кафолатламаслигини таъкидлаган. Қозоғистон чегарачилари қонунчиликда белгиланган асослар бўйича чет эл фуқароларининг киришини рад этиши мумкин.
