Қозоғистонга 5 йилдан эски автомобилларни олиб кириш тақиқланади: янги талаблар қачондан кучга киради?
Мамлакатга автомобиль олиб киришда унинг ишлаб чиқарилган санаси ва экологик тоифаси ҳисобга олинади.
Қозоғистон шахсий фойдаланиш учун мамлакатга олиб кириладиган автомобилларга янги талабларни жорий этмоқда. Унга кўра, транспорт воситалари ишлаб чиқарилган кундан бошлаб беш йилдан ошмаган ва камида Евро-5 экологик стандартига жавоб бериши керак.
Бу ҳақдаги ўзгартиришлар Қозоғистон Саноат ва қурилиш вазирлиги томонидан тасдиқланган. Тегишли буйруқ мамлакатнинг норматив-ҳуқуқий ҳужжатлари маълумотлар базасида эълон қилинган.
Янги талабларга мувофиқ, жисмоний шахслар шахсий фойдаланиш учун олиб кирадиган автомобилларни Қозоғистонда муомалага чиқаришга фақат иккита шарт бажарилганда рухсат берилади: транспорт воситаси камида 5-экологик тоифага мос бўлиши ва ишлаб чиқарилганига беш йилдан ошмаган бўлиши лозим.
Талаблар шахсий фойдаланиш учун мўлжалланган айрим турдаги автомобиллар, мототцикллар ва улар учун тиркамаларга нисбатан қўлланилади.
Буйруқ биринчи расмий эълон қилинган кундан 60 календарь кун ўтиб, 2026 йил 30 декабрдан кучга киради.
