Хонанда Жаҳонгир Отажановни бошқа бир хонанда миллиардлаб пулга “ухлатди”
Хонандалар талабалик давридан ака-ука каби дўст бўлган.
Ўзбекистоннинг машҳур хонандаси Жаҳонгир Отажанов фирибгарлик қурбони бўлди. Талбалик давридан ака-ука каби дўст бўлган яна бир хонанда Ҳ.Ҳ. 2,3 миллиард сўм миқдорида пулни ўзлаштирган. Фирибгарлик жараёнида Отажановнинг Lexus ва BMW русумли автомашиналари, уйларини сотиб олиш ва турли хизматлар эвазига тўланган пуллар талон-торож қилинган. Бу ҳақда Тошкент шаҳар судлари Zamon.uz'га маълум қилди.
Маълумотларга кўра, Ҳ.Ҳ. 2017 йилдан бошлаб Отажанов билан турли шартномалар асосида олди-берди қилган, лекин тўловларни амалга оширмай, ўз эҳтиёжларига сарфлаган. Шу жумладан, машиналар сотиб олиниши, тўй ва уйлар билан боғлиқ бир нечта эпизодлар суд ҳужжатларига киритилган.
Суд жараёнида Ҳ.Ҳ. қилган жиноятни қисман тан олиб, зарар етказган пулларни санъат фаолияти учун ишлатганини айтган. Шу билан бирга, у зарар етказилган маблағни қайтаришга тайёрлигини билдирган. Суднинг якуний қарорига кўра, Ҳ.Ҳ. Ўзбекистон Жиноят кодексининг 168-моддаси 4-қисми “а” банди бўйича айбли деб топилди ва 8 йилга озодликдан маҳрум қилинди.
Шунингдек, Ҳ.Ҳ. номига расмийлаштирилган Тошкент шаҳридаги икки уй ҳам сотувга қўйилиб, сотувдан тушган маблағ Отажановга етказилган моддий зарар ҳисобига йўналтирилади. Шу тариқа, фирибгарлик натижасида етказилган зарар қисман қопланган бўлади.
