Тошкентда Давлат байроғи куни муносабати билан дронлар шоуси бўлиб ўтади
Байрам тадбирлари доирасида спортчилар ва миллий эстрада юлдузлари иштирокида турли маданий-маърифий тадбирлар ташкил этилади.
18 ноябрь куни Тошкент шаҳрида Ўзбекистон Давлат байроғи қабул қилинган кун муносабати билан бир қатор байрам тадбирлари ўтказилади. Пойтахт ҳокимлиги хабарига кўра, тадбирлар спортчилар, эстрада юлдузлари ва ёшлар иштирокида ўтказиладиган байроқ эстафетаси учрашувларини ҳам ўз ичига олади. Байрам дастури Бектемир, Мирзо Улуғбек ва Чилонзор туманларида жойлашган постларда бошланган тадбирларни қамраб олади.
Шунингдек, “Халқлар дўстлиги” майдонида соат 17:00 да миллий эстрада юлдузларининг ғалаконсерти бўлиб ўтади. Соат 18:00 да эса байрамнинг энг кутилган қисми — дронлар шоуси намойиш этилади. Тадбир аҳолига очиқ бўлиб, барча иштирокчилар байрамона муҳитдан баҳраманд бўлиш имкониятига эга бўлади.
Аввалроқ, шу кун Тошкентда Давлат байроғининг 34 йиллиги муносабати билан ҳарбий парад ҳам ўтказилиши режалаштирилгани ҳақида хабар берилган. Шу тариқа, 18 ноябрь шаҳарда нафақат маданий, балки ҳарбий ва технологик намойишларга бой бўлади.
