Тошкентда наркотик савдоси билан шуғулланган она-бола қўлга олинди

Тошкент шаҳрида ДХХнинг шаҳар бошқармаси, ИИББ ва Божхона хизмати ҳамкорлигида ўтказилган махсус операция давомида наркотик моддаларнинг контрабандаси билан шуғулланган оила аъзолари қўлга олинди. Улар гиёҳвандлик воситаларини Тожикистондан яширин йўллар билан олиб кириб, пойтахтда сотишга ҳаракат қилгани аниқланган. Бу ҳақда Zamon.uz'га ДХХ хабар қилди.

 

Операция жараёнида «Оҳангарон–Пискент» йўналишида ҳаракатланаётган, олдиндан назоратга олинган «ЭҚУИНОХ» русумли автомобиль тўхтатилиб текширилди. Машинада бўлган 1976 йилда туғилган аёл ва унинг 1999 йилда туғилган ўғли контрабанда йўли билан кириб келган наркотик моддани олиш учун йўлга чиққанликлари маълум бўлди. Уларнинг телефонларини кўздан кечириш чоғида тожикистонлик шахс томонидан «Телеграм» орқали гиёҳвандлик моддасининг жойлашуви ва фотосуратлари юборилгани аниқланди. Шундан сўнг тезкор гуруҳ Пискент туманидаги йўл четига яширилган 4,9 кг «гашиш»ни далил сифатида топиб олди.

 

Шунингдек, гумондорларнинг Олмазор туманидаги уйида ўтказилган тинтув чоғида қўшимча равишда 1,1 кг «опий» ва 1,9 кг «гашиш» моддаси ҳам топилди. Аёлнинг аввал судланган, 1996 йилда туғилган яна бир ўғли ҳам ушбу жиноятга алоқадорликда гумонланиб қўлга олинди.

 

Ҳозирда улар устидан Жиноят кодексининг тегишли моддалари бўйича иш қўзғатилиб, «қамоқ» эҳтиёт чораси қўлланган. Тезкор-тергов ҳаракатлари давом этмоқда.