2028 йилда Самарқандда Халқаро астронавтика конгресси бўлиб ўтади
Шавкат Мирзиёев янги иқтисодий имкониятларни аниқлашга қаратилган космик лойиҳалар тақдимоти билан танишди.
16 октябрь куни Президент Шавкат Мирзиёев космик мониторинг орқали иқтисодий имкониятларни аниқлаш ва тармоқларда ушбу технологиялардан фойдаланиш самарадорлигини ошириш масалалари юзасидан тақдимот билан танишди.
Тақдимотда Рақамли технологиялар вазирлиги ҳузуридаги Космик тадқиқотлар ва технологиялар агентлиги томонидан амалга оширилаётган ишлар ва истиқболдаги режалар муҳокама қилинди. Айтиб ўтилдики, мамлакатимизда геология, ер ресурслари ва экология соҳаларида давлат космик мониторинги тизимли йўлга қўйилмоқда. Йил бошидан буён 2 мингдан ортиқ ноқонуний кон ишлатиш ҳолатлари сунъий йўлдошлар орқали аниқланган.
Шунингдек, Президент ноқонуний қурилишларни аниқлаш, бўш турган ерларни иқтисодий фаолиятга жалб этиш ҳамда космик таҳлилларни иқтисодиёт тармоқларига кенг жорий этиш зарурлигини таъкидлади. Шу мақсадда ахборот платформаларини интеграциялаш ва тезкор назорат тизимини яратиш топшириғи берилди.
Космик технологиялар ёрдамида ўрганилган олтита ҳудудда 300 гектарга яқин бўш ерлар аниқланди. Келгуси йилда барча туман марказларида бу борадаги ишларни якунлаш белгилаб олинди.
Тақдимотда, шунингдек, сунъий интеллект орқали космик маълумотларни таҳлил қилиш, ўрмон ҳолатини кузатиш, метан сизиб чиқишини аниқлаш, қуёш панеллари ва инфратузилма самарадорлигини баҳолаш каби инновацион йўналишлар муҳокама қилинди.
Давлат раҳбари 2028 йилда Самарқандда бўлиб ўтадиган Халқаро астронавтика конгрессига пухта тайёргарлик кўриш бўйича топшириқлар берди.
