53 ёшли ТикТок юлдузи, мусиқачи ва телебошловчи... — Аргентинанинг янги президенти ҳақида нималар маълум?

 

Аргентинада ўнг қанот «Озодлик келяпти» алянси бир қисми бўлган Либертарлар партиясига раҳбарлик қилувчи Хавер Милей президентлик сайловларида ғалаба қозонди.

 

Дастлабки натижаларга кўра, у 56 фоизга яқин овоз тўплаган. 20 ноябрь, душанбага ўтар кечаси Милейни сайловлардаги ғалабаси билан унинг рақиби, «Ватан учун иттифоқ» ҳукмрон коалициясидан номзод бўлган Аргентина иқтисодиёт вазири Серхио Масса ҳамда бир қатор Лотин Америкаси давлатлари етакчилари табриклади.

 

«Мен Хавер Милей билан боғланиб, уни табрикладим ва омад тиладим, чунки у аргентиналикларнинг кўпчилиги кейинги тўрт йилга танлаган президент», — деди Серхио Масса овоз беришнинг расмий натижалари эълон қилинишидан олдин. 

 

Милейнинг улкан ваъдалари

 

53 ёшли ТикТок юлдузи, мусиқачи, иқтисодчи ва телебошловчи ўзининг ғалати услуби ва мунозарали баёнотлари туфайли АҚШнинг собиқ президенти Дональд Трамп ва Бразилиянинг собиқ президенти Жаир Болсонаро билан таққосланади. Хусусан, у АҚШ доллари учун “касал песодан воз кечишга" чақирган ва "инфляция саратони"ни тугатиш учун Марказий банкни ёқиб юборишга ваъда берган.

 

AFPʼнинг эслашича, Милей абортга, ўқотар қурол олиб юришга қарши чиққан, Аргентинанинг асосий савдо ҳамкорлари — Хитой ва Бразилия билан алоқаларни узишга ваъда берган. Шунингдек, у ҳарбий диктатура қурбонлари сонини шубҳа остига олган ва иқлим ўзгаришига инсон фаолияти сабаб бўлганини тан олмайди.

 

Милейни собиқ ва амалдаги давлат раҳбарлари табриклади

 

Айни пайтда, Бразилия президенти Луис Инасиу Лула да Силва X ижтимоий тармоғи орқали Аргентина янги ҳукуматига Милей исмини тилга олмай, "омад ва муваффақият" тилади.

 

"Бразилия аргентиналик биродарларимиз билан ҳамкорлик қилиш учун доимо тайёр бўлади", — дея қўшимча қилди президент. 

 

Чили президенти Габриэл Борич Фонт ҳам X ижтимоий тармоғида Милейга табрикларни етказди. Аммо Колумбия президенти Густаво Петро Аргентинадаги президентлик сайловларида ўнг қанот номзоди ғалабасидан ҳафсаласи пир бўлганини билдириб, буни «Лотин Америкаси учун қайғули воқеа» деб атади. 

 

"Неолиберализм энди жамиятга ҳеч нарса таклиф қила олмайди, у инсониятнинг долзарб муаммоларига жавоб бера олмайди", — деб ёзган Петро X ижтимоий тармоғида.

 

Айни пайтда, АҚШ собиқ президенти Дональд Трамп Truth Social ижтимоий тармоғида Милей билан «жуда фахрланишини» айтди. 2024 йилда АҚШ президентлиги учун яна курашмоқчи бўлган республикачи: "Сиз ўз мамлакатингизни ривожлантирасиз ва Аргентинани яна буюк қиласиз", деб ёзган.