Andijon tumanida 30-mart kuni Spark rusumli avtomobil haydovchisi YPX inspektorini urib, voqea joyidan qochib ketgan. Hodisa Urikzor mahallasida sodir bo‘lgan.
Dastlab haydovchi svetoforda to‘xtab turgan boshqa Spark avtomobiliga urilib, yo‘l-transport hodisasi sodir etgan. YPX xodimlari uni to‘xtatishga uringan, biroq haydovchi qonuniy talablarni bajarmay, inspektorni urib, harakatni davom ettirgan.
Tekshiruv davomida haydovchining mast holda ekani va avval haydovchilik guvohnomasidan mahrum etilgani aniqlangan. Holat yuzasidan hujjatlar rasmiylashtirilib, ish sudga oshirildi.