Байден Украинага ташриф буюришга тайёр
АҚШ хавфсизлик нуқтаи назаридан сафар ҳақида олдиндан хабар бермайди
АҚШ президенти Жо Байден 14 апрель куни Украинага ташриф буюришни хоҳлашини айтди ва унинг маъмуриятидан урушдан вайрон бўлган Киевга юқори мартабали амалдорни юбориш ҳақидаги хабарни тасдиқлади. Бу ҳақда “Daily Mail” хабар берди.
Президент Украинага боришга тайёрмисиз деган саволга «Ҳа» деб жавоб берган.
Аввалроқ АҚШ маъмурияти Украинани қўллаб-қувватлашини намойиш этиш мақсадида Киевга АҚШнинг юқори мартабали мулозимини юбориш бўйича ички муҳокамалар олиб бораётгани ҳақида хабар берган эди. Киевга сафар қилиш учун энг эҳтимолий номзодлар АҚШ Давлат котиби Энтони Блинкен ёки Мудофаа вазири Ллойд Остин бўлиши мумкин.
Маъмурият АҚШ президентининг ўзи ва АҚШ вице-президенти Камала Харриснинг номзодларини ҳам кўриб чиқмоқда.
АҚШ ҳукумати Киевга кимнидир жўнатишга қарор қилса, хавфсизлик нуқтаи назаридан сафар ҳақида олдиндан хабар бермайди.
Эслатиб ўтамиз, аввалроқ Полша, Латвия, Литва ва Эстония президентлари поездда Киевга боргани маълум қилинганди.
