Samarqand viloyati Urgut tumanida ota besh yoshli farzandini tepib, yerga yiqitdi. Holat yuzasidan tuman hokimligi ma’lumot berdi.
Ma’lum qilinishicha, holat 1-iyul kuni soat taxminan 14:30 lar atrofida Urgut tuman "Mergancha" mahallasida joylashgan "Urgut" savdo kompleksida sodir bo‘lgan. Savdo qilish uchun kelgan er va xotin voyaga yetmagan farzandlari bilan bozor bo‘ylab yurgan vaqtida bozor ichida ota voyaga yetmagan taxminan 5 yoshli o‘g‘il farzandini oyog‘i bilan tepib yerga yiqitgani holati savdo kompleksida o‘rnatilgan kuzatuv kameralariga muhrlanib qolgan.
Holat yuzasidan voyaga yetmagan bolaga shafqatsiz munosabatda bo‘lgan otani topish va shaxsiga aniqlik kiritish maqsadida Urgut tuman IIB tomonidan olib borilgan tezkor surishtiruv ishlari davomida ushbu fuqaro Qashqadaryo viloyati Gʻuzor tumani "Qovchin" mahallasida yashovchi A.F. ekani aniqlangan.