CNN Янги йил эфирида Ислом цивилизацияси марказини намойиш этди
Халқаро телеканал ярим соатлик ҳужжатли фильм орқали Ўзбекистонни ислом оламининг муҳим тарихий маркази сифатида таништирди.
Халқаро CNN телеканали Янги йил дастурлари доирасида Ўзбекистондаги Ислом цивилизацияси марказига бағишланган ярим соатлик ҳужжатли фильмни томошабинларга тақдим этди. Фильмда ноёб тарихий экспонатлар ва бебаҳо маданий мерос намуналари орқали Ўзбекистоннинг ислом цивилизациясидаги ўрни ва аҳамияти ёритилган.
Таъкидлаш жоизки, мазкур лойиҳа CNN ташаббуси билан, телеканалнинг муаллифлик ҳужжатли фильми сифатида яратилган. Янги йил эфирлари давомида фильм беш маротаба намойиш этилди. Бу ҳолат Ислом цивилизацияси маркази ва Ўзбекистоннинг бой маданий меросига халқаро аудитория томонидан катта қизиқиш билдирилаётганидан далолат беради.
Фильм намойишидан аввал эксклюзив видеоролик эълон қилиниб, унда марказнинг Ўзбекистон Президенти Шавкат Мирзиёев ташаббуси билан яратилган концепцияси ёритилди. Видеоматериалда халқаро сиёсатчилар ва жамоат арбоблари ушбу марказни маърифат, мулоқот ва бағрикенглик ғояларига асосланган замонавий маданий маскан сифатида юқори баҳолади.
10 гектар майдонда барпо этилган Ислом цивилизацияси маркази беш галереяни ўзида жамлаган бўлиб, унда Усмон мушафи, Муқаддас Каъба калитлари, Амир Темур хазинасидаги Қуръон саҳифалари каби дунё миқёсидаги ноёб артефактлар намойиш этилади. Марказ Мовароуннаҳр алломаларининг жаҳон илм-фани ва маданиятига қўшган улкан ҳиссасини кенг жамоатчиликка очиб берувчи муҳим маданий маскан сифатида эътироф этилмоқда.
