Senatning o‘n birinchi yalpi majlisida "Davlat ijtimoiy sug‘urtasi to‘g‘risida"gi qonun loyihasi muhokama qilindi.
Senatning Fan ta'lim va sog‘liqni saqlash masalalari bo‘yicha qo‘mita raisi o‘rinbosari Oral Ataniazovaning aytishicha, 2024-yilda 133 mingga yaqin ayollarning tug‘ruq nafaqalari to‘lanib berilgan. Shundan 15 mingdan ko‘prog‘i xususiy sektorda ishlovchi ayollar hissasiga to‘g‘ri kelmoqda.
Ma’lum bo‘lishicha, xususiy sektorda har yili kamida 150-160 ming ayol tug‘ruq ta'tiliga chiqadi.
Yangi qonun loyihasiga ko‘ra, Davlat ijtimoiy sug‘urta jamg‘armasi tomonidan uch turdagi, ya’ni kasallik munosabati bilan vaqtincha mehnatga layoqatsizlik, homiladorlik va tug‘ish, ishni yo daromadni yo‘qotish bo‘yicha sug‘urta to‘lovlari to‘lanishi belgilanmoqda.
Bunday sug‘urta hodisalari yuzaga kelgan taqdirda, jamg‘arma tomonidan sug‘urtalangan shaxslarga yoki ularning oila a’zolariga davlat ijtimoiy sug‘urtasi bo‘yicha vaqtincha mehnatga layoqatsizlik nafaqasi, homiladorlik va tug‘ish nafaqasi, ishdan bo‘shatish nafaqasi to‘lanib berilishi nazarda tutilmoqda.