Eron prezidenti Mas'ud Pezeshkian va hukumat rasmiylari Tehronda yuzaga kelgan misli ko‘rilmagan suv inqirozi yuzasidan jiddiy ogohlantirish berdi. Ma’lum qilinishicha, poytaxtda ichimlik suvi zaxiralari keskin kamaygan bo‘lib, ular ikki hafta ichida tugab qolishi mumkin. Holat nazoratdan chiqishi ehtimoli bois, 10 milliondan ortiq aholining vaqtinchalik evakuatsiya qilinishi masalasi muhokama qilinmoqda.
Tehron suv ta’minoti kompaniyasi rahbari Behzod Parsiyning bildirishicha, shaharni suv bilan ta’minlab kelayotgan besh asosiy suv omboridan biri — Amir Kabir to‘g‘oni hozirda quvvatining atigi 8 foizi, ya’ni 14 million kub metr suvni saqlab turibdi. Taqqoslash uchun, o‘tgan yilning shu davrida mazkur ko‘rsatkich 86 million kub metrni tashkil etgan.
Bahor va yoz mavsumlarida yog‘ingarchilikning keskin kamayishi oqibatida suv omborlaridagi suv sathi jiddiy pasaygan. Bu esa yer usti va yer osti suv manbalariga ham salbiy ta’sir ko‘rsatgan. Tehronning kunlik suv iste’moli 3 million kub metrga yaqin bo‘lib, so‘nggi kunlarda ayrim hududlarda suv ta’minoti allaqachon cheklana boshlagan.
Mutaxassislar ogohlantirishicha, yaqin kunlarda yog‘ingarchilik kuzatilmasa va shoshilinch choralar ko‘rilmasa, poytaxtda yirik gumanitar inqiroz yuzaga kelishi mumkin.