Эрон Саудия Арабистони билан муносабатларни яхшиламоқчи
Мамлакат ташқи ишлар вазири бунга тайёрлигини маълум қилди.
Эрон Саудия Арабистони билан муносабатларни исталган пайтда нормаллаштиришга тайёр эканини маълум қилди. Бу ҳақда мамлакат ташқи ишлар вазири Амир Абдуллоҳиян Al Jazeera телеканалига берган интервьюсида айтиб ўтган.
“Теҳрон Ар-Риёд билан муносабатларни исталган пайтда яхшилашга тайёр”, – деган Эрон бош дипломати.
Шунингдек, у тез орада мамлакатнинг Ислом Ҳамкорлик Ташкилотидаги вакили Жидда шаҳрига қайтишини маълум қилган.
Шу билан бирга Абдуллохиян минтақадаги долзарб масалларни Эрон, Саудия Арабистони, Миср ҳамда Туркия билан биргаликда муҳокама қилишни таклиф қилган.
Сиёсатчи Вена шаҳрида Эрон ядро дастури бўйича музокараларга ҳам тўхталиб ўтган. Унинг фикрича, агар Ғарбли ҳамкорлар зарур сиёсий ирода кўрсата олса, келишувга эришиш мумкин. Шунингдек, Теҳрон АҚШ собиқ президенти Дональд Трамп томонидан жорий қилинган санкцияларни бекор қилишни талаб қилаётгани таъкидланган.
Абдуллоҳияннинг қўшимча қилишича, “Келажакдаги эришиладиган исталган келишувлар Эронга ҳеч қандай тўсиқсиз нефть сотиш ва даромад олиш имконини бериши керак”.
Аввалроқ Эрон президенти Иброҳим Раисий Дональд Трампни судга бериш кераклигини айтганди.
Жаҳонгир Қўзиев
