Ijtimoiy tarmoqda Farg‘onada yurib ketayotgan avtomashinadan tushib ketgan yigitni boshqa mashina bosib ketgani aks etgan video tarqalmoqda. Holat yuzasidan viloyat IIB rasmiy munosabat bildirdi.
Holat 16 iyul kuni Farg‘ona shahar Qirguli mavzesida sodir bo‘lgan. Damas rusumli avtomashinada yo‘lovchi sifatida ketayotgan fuqaro D.P. avtomobilning orqa eshigini ochib, sakrab yuborgan va qarama-qarshi tomonidan kelayotgan avtomobilning old qismiga kelib urilgan.
Oqibatda D.P. tan jarohati olib, kasalxonaga yotqizilgan. Ko‘rsatilgan tibbiy yordamga qaramasdan u kasalxonada vafot etgan.
Hozirda mazkur holat yuzasidan Jinoyat kodeksining 266-moddasi 2-qismi bilan jinoyat ishi qo‘zg‘atilib, dastlabki tergov harakatlari olib borilmoqda.