Исроилдаги Гилбоа қамоқхонасидан ер ости туннели орқали олти маҳбус қочиб кетди
Бугун эрталаб террорчилик фаолиятида иштирок этган олти маҳбус Исроил шимолидаги Гилбоа қамоқхонасидан қочиб кетди, деб хабар беради “Newcpy.co.il.”
Мамлакат қамоқхона бошқармаси бу хабарни тасдиқлади.
Қайд этилишича, маҳбуслар узоқ муддатли қамоқ жазосига ҳукм қилинган террорчилар сақланаётган Гилбоа қамоқхонасидан туннел орқали қочиб кетган.
Полиция уларни вертолёт ва учувчисиз самолётлар ёрдамида қидирмоқда. Қидирувга махфий хизматлар ва ҳарбийлар ҳам жалб қилинган.
Беш маҳбус "Исломий жиҳод" террорчилик ташкилотининг фаоллари бўлган. Олтинчиси — "Фатҳ" террорчилик гуруҳи етакчиларидан бири Захария Зубейдий. Қочишни айнан у ташкил этгани тахмин қилинмоқда.
Маҳбуслар ҳожатхона тагидан туннел қазиган ва канализация ўқи орқали қочишга муваффақ бўлган. Гувоҳлардан бирининг сўзларига кўра, қочқинларни маҳаллий деҳқонлар пайқаб қолиб полицияга хабар берган.
Исроил бош вазири Нафтали Беннет зудлик билан ички хавфсизлик вазири Омер Бар-Лев билан воқеани муҳокама қилган ва ҳодисанинг ўта жиддийлигини қайд этиб, хавфсизлик кучлари тизимли ҳаракат қилиши зарурлигини таъкидлаган.
Насиба Тўхтаева
