Лувр талончилиги бўйича икки киши қўлга олинди
Тергов жараёнида музей хавфсизлик ходимларидан бири жиноятга алоқадорликда гумон қилинмоқда.
Париж полицияси Лувр музейида содир бўлган йирик ўғирлик иши доирасида икки нафар гумонланувчини қўлга олди. Бу ҳақда “Le Figaro” нашри хабар берди.
Ҳуқуқни муҳофаза қилувчи органларнинг маълум қилишича, 25 октябрь куни гумонланувчилардан бири Шарл де Голл аэропортида Жазоирга учмоқчи бўлганида ушланган. Иккинчи шахс эса Парижнинг Сен-Сен-Дени туманида қўлга олинган.
Ҳар икки киши уюшган ҳолда жиноят содир этиш ва тил бириктиришда айбланиб, қамоққа олинган. Шу билан бирга, ўғирланган қимматбахо француз тож тақинчоқлари ҳануз топилмаган.
Париж прокурори Лаура Бекко тергов давомида жиноят жойидан 150 дан ортиқ ДНК излари ва бошқа далиллар топилганини маълум қилди. Видеокузатув ёзувлари ёрдамида жиноятчиларнинг ҳаракат йўналиши аниқланган.
“The Telegraph” нашрига кўра, тергов доирасида музей қўриқчиларидан бири ҳам гумон остига олинган. Дастлабки маълумотларга кўра, у жиноятчиларга Луврнинг хавфсизлик тизими ҳақидаги маҳфий маълумотларни етказган бўлиши мумкин.
Ҳозирда тергов ишлари давом этмоқда, қолган гумонланувчилар ва ўғирланган буюмларни аниқлаш бўйича изланишлар олиб борилмоқда.
