Jinoyat ishlari bo‘yicha Namangan viloyati Pop tuman sudida Odilxon qori Yunusxon o‘g‘liga oid jinoyat ishi bo‘yicha sud jarayoni boshlandi.
Sudda ma’lum qilinishicha, bir hafta avval sud zalining o‘zida hibsga olingan Odilxon Ismoilovga nisbatan O‘zbekiston Respublikasi Jinoyat kodeksining bir nechta moddalari bilan ayblovlar e’lon qilingan.
Xususan, unga:
- JKning 167-moddasi 3-qismi (“a” va “v” bandlari) — yirik miqdorda o‘zlashtirish yoki rastrata,
- 179-modda — soxta tadbirkorlik,
- 189-moddaning 1-qismi — savdo yoki xizmat ko‘rsatish qoidalarini buzish,
- 209-moddaning 2-qismi (“a” bandi) — mansab soxtakorligi,
- shuningdek, 227-moddaning 2-qismi (“a” bandi) hamda 228-moddaning 2 va 3-qismlari — hujjatlar, muhrlar, shtamplar va blanklarni tayyorlash, qalbakilashtirish, sotish yoki ulardan noqonuniy foydalanish bilan bog‘liq ayblovlar qo‘yilgan.
Ma’lumot o‘rnida, Odilxon qori Yunusxon o‘g‘li avvalroq Toshkent shahridagi “Shayx Zayniddin” (Ko‘kcha), “Firdavs” hamda “Xo‘ja Alambardor” (Kamolon) masjidlarida imom-xatib sifatida faoliyat yuritgan. Shuningdek, u bir muddat “Vaqf” fondi rahbariyatida ham ishlagan.