Namangan viloyatining Kosonsoy tumanidagi “Obod” MFY hududidan oqib o‘tuvchi «Kosonsoy» soyi. Ayni paytda bu yerda FVV, Milliy gvardiya, ichki ishlar xodimlari va ko‘ngillilar 13 iyul kuni sel oqizib ketgan 7 yoshli Muhammadyusuf Rustamovni qidirmoqda.
“Bu fojia go‘yo tushimda sodir bo‘lgandek...”
Qidirilayotgan bolaning amakisi Abdulaziz Ahmadjonov hikoyasi:
“13 iyul kuni ertalab akam oilamiz ayollarini olib, Kosonsoyga dam olishga chiqib ketgandi. Tushdan so‘ng menga qo‘ng‘iroq bo‘ldi va zudlik bilan ko‘chaga chiqishimni aytishdi. Shosha-pisha ishdan chiqdim. Meni mashinaga solib, uyga olib ketishdi. Nima bo‘layotganini hech anglolmadim. Yarim yo‘lda jiyanlarimni sel oqizib ketganini aytishdi. U yog‘ini eslolmayman...
Uyga keldim. Akam bilan ko‘rishganim ham elas-elas yodimda. Hozir ham o‘zimda emasman, go‘yo bu fojia tushimda sodir bo‘lgandek. Fikru-yodim jiyanlarimda.
O‘sha kuni akam o‘g‘illari — 7 yoshli Muhammadyusuf va 6 yoshli Abubakrni ham Kosonsoyga olib ketgan. Tushlikdan so‘ng ular cho‘milish uchun soyga, suv bo‘yiga tushishgan. Biroz o‘tgandan so‘ng soy tomondan odamlarning qiy-chuvi, to‘poloni, shovqin-suroni eshitilgan. O‘sha zahotiyoq akam farzandlarining oldiga yugurib borgan. Ming afsuski, o‘g‘illarini topolmagan. Sel odamlarni oqizib ketgan. Ular orasida jiyanlarim ham bor ekan. Kichik jiyanim o‘sha kunning o‘zida topildi. Kecha ertalab uni tuproqqa qo‘ydik. Muhammadyusufni qidiryapmiz, hali topilgani yo‘q. Jiyanlarimni o‘z farzandimdek aziz ko‘rardim...
Oilamiz uchun bu og‘ir musibat sinov bo‘ldi. Endigina 30 yoshga kirgan akam va kelinoyimning ko‘ziga qarasam, ichimdagi dard-alamlarni yengolmayapman. Bir o‘g‘lini tuproqqa qo‘yishdi. Ikkinchisi esa bedarak yo‘qolgan. Shukr, 4 yoshli o‘g‘li sog‘-salomat, bag‘irlarida. Hech bir insonga bunday sinov berilmasin ekan. Buni so‘z bilan tushuntirib berolmayman, juda og‘ir...
Kutilmagan musibat oilamiz va yaqinlarimiz uchun katta yo‘qotish bo‘ldi. Chunki halok bo‘lgan va kasalxonalarga murojaat etganlarning aksariyati bizning yaqinlarimiz. Ayni paytda biz ko‘ngilli insonlarning ko‘magiga muhtojmiz. Jiyanim tezroq topilishidan umidvormiz.», — deydi Namangan shahrida istiqomat qiluvchi Abdulaziz Ahmadjonov.
Oxirgi maʼlumotlarga ko‘ra, Kosonsoy tumaniga sel yopirilishi oqibatida jami 8 kishi halok bo‘lgan. Ularning 7 nafari ayol, bir nafari o‘g‘il bola bo‘lib, eng kattasi 48, eng kichigi esa 6 yoshda bo‘lgan.
Bahriniso MADUMAROVA