Ўзбекистон Женевада кўчирилган ва фуқаролиги бўлмаган шахслар ҳуқуқларини ҳимоя қилиш тажрибасини тақдим этмоқда
Глобал форум доирасида Ўзбекистоннинг фуқаросизликни қисқартириш, инсон ҳуқуқларини ҳимоя қилиш борасидаги ютуқлари муҳокама қилинмоқда.
15–17 декабрь кунлари Женева шаҳрида 2025 йилги Қочқинлар бўйича глобал форум тараққиёти шарҳига бағишланган юқори мансабдор шахсларнинг иккинчи учрашуви бўлиб ўтмоқда. Унда Инсон ҳуқуқлари бўйича Ўзбекистон Республикаси Миллий маркази директори Акмал Саидов бошчилигидаги Ўзбекистон делегацияси иштирок этмоқда. Тадбир БМТ Қочқинлар ишлари бўйича олий комиссари бошқармаси томонидан Швейтсария Конфедерацияси билан ҳамкорликда ташкил этилган.
Форум доирасида Ўзбекистон кўчирилган ва фуқаролиги бўлмаган шахслар ҳуқуқларини ҳимоя қилиш борасидаги миллий тажрибаси ва эришилган натижаларни тақдим этмоқда. Хусусан, халқаро стандартларга мос равишда ҳуқуқий база изчил мустаҳкамланаётгани, янги таҳрирдаги Конституцияда чет эл фуқаролари ва фуқаролиги бўлмаган шахсларнинг ҳуқуқ ва эркинликлари кафолатлангани таъкидланмоқда. #ИБелонг глобал кампанияси доирасида 85 минг нафардан ортиқ шахс Ўзбекистон фуқаролигига эга бўлиб, мамлакат Марказий Осиёда фуқаросизликни камайтириш бўйича энг барқарор натижалардан бирига эришди.
Шунингдек, Ўзбекистон қўшни Афғонистондаги инсонпарварлик инқирози шароитида БМТ Қочқинлар ишлари бўйича олий комиссари бошқармасининг Термиздаги минтақавий логистика маркази фаолиятини қўллаб-қувватлаб, зарур ёрдамларни тезкор етказишга ҳисса қўшгани қайд этилди. Форум давомида қочқинлар ва уларни қабул қилувчи давлатларни қўллаб-қувватлашни кенгайтириш, халқаро ҳамкорликни мустаҳкамлаш ва илғор тажрибалар алмашиш масалалари муҳокама қилинади.
