Ўзбекистонда президентлик сайловлари 24 октябрь куни бўлиб ўтади
Бу ҳақда 23 июль куни Марказий сайлов комиссиясининг навбатдаги йиғилишида тегишли қарор қабул қилинди ва сайлов куни этиб 24 октябрь санаси белгиланди.
Ўзбекистонда сайлов кампанияси расман 23 июльдан бошланди. Бу ҳақда Марказий Сайлов комиссияси раиси З.Низомхўжаев маълум қилди.
Низомхўжаевнинг таъкидлашича, Илк бор Ўзбекистон Республикасининг Сайлов кодекси асосида ўтадиган Президент сайловида конституциявий қоидалар ва халқаро сайлов стандартларига биноан Ўзбекистон Республикасининг Президенти, яъни давлат раҳбари даврийлик принципи асосида сайланиши таъминланади. Шунингдек бу йилги сайловда сиёсий партиялар сони яна биттага кўпайиб, сиёсий рақобат сезиларли даражада оширади.
Мажлисда сайлов кампанияси даврида барча сиёсий партиялар ва улар кўрсатган номзодлар учун соғлом рақобат муҳити ва тенг шароит яратилиши алоҳида таъкидланди. Бунда Президент сайловига тайёргарлик кўриш ва уни ўтказиш билан боғлиқ ишларни, жумладан, сайловчиларнинг овоз бериш жараёнини ўз номзодини илгари сурган сиёсий партиялар, фуқаролар ўзини ўзи бошқариш органлари, халқаро ташкилотлар ва хорижий давлатлар вакиллари, журналистлар, жумладан, хорижлик журналистлар – минглаб кузатувчилар кузатиб боради.
