Ўзбекистонлик уч нафар муҳожир Россиядан чиқариб юборилди
Улар қалбаки меҳнат шартномалари асосида расмийлаштирилган.
Россиянинг Норильск шаҳрида ноқонуний яшаган уч нафар ўзбекистонлик фуқаролар депортация қилинди.
Маълумотларга кўра, Норильскдаги “Plov House Elite” кафелар тармоғи Ўзбекистондан ошпазларни ёллаб, уларни баржада ноқонуний олиб ўтган, қалбаки меҳнат шартномалари тузиб, рўйхатдан ўтказиш учун сохта ҳужжатлар билан расмийлаштирган.
Ўзбекистоннинг Новосибирскдаги Бош консуллиги хабар беришича, улар 22 октябрь куни қўлга олинган. Уларнинг ҳибсга олиниши Норильск шаҳри чет эл фуқаролари учун кириш тақиқланган ҳудуд бўлганлиги билан боғлиқ. Шаҳар ҳудудида ишлаш ва яшаш фақат Россия Федерал Хавфсизлик Хизмати (ФСБ) рухсати билан амалга оширилади.
Мигрантларни ноқонуний ишга жойлаштириш ва қонунийлаштиришга алоқадор шахсларга нисбатан жиноий иш очилган. Ҳозиргача саккиз нафар гумонланувчи ҳибсга олинган бўлиб, жиноятнинг бошқа иштирокчилари аниқланмоқда.
Ўзбекистонлик уч нафар фуқарога маъмурий жавобгарлик қўлланиб, улар Россиядан чиқариб юборилди.
