Путин Зеленский билан учрашишга рози бўлди — Рубио
Уларнинг учрашуви Венгрияда бўлиши мумкин.
Россия президенти Владимир Путин украиналик ҳамкасби Владимир Зеленский билан учрашишга тайёр. Бу ҳақида АҚШ давлат котиби Марко Рубио Fox News телеканалига берган интервьюсида айтиб ўтди.
Рубионинг сўзларига кўра, Россия ва Украина етакчилари ўртасида учрашув ўтказиш таклифи АҚШ президенти Доналд Трамп томонидан илгари сурилган. Америка томони ҳозирда уни ташкиллаштириш устида ишламоқда.
“Агар ҳаммаси яхши бўлса, умид қиламанки, кейинги учрашув президентлар Путин, Трамп ва Зеленский ўртасида бўлади. Биз у ерда келишувни якунлаймиз деб умид қиламиз. Путиннинг “Яхши, мен Зеленский билан учрашаман”, деган гапи катта воқеа”, деди АҚШ Давлат котиби.
Россия ташқи ишлар вазири Сергей Лавров Зеленский ва Путин ўртасидаги учрашув эҳтимолини изоҳлар экан, бу жуда тез содир бўлмаслигини очиқ айтди.
Реутерс агентлиги Путин ва Зеленский Венгрияда икки томонлама учрашув ўтказиши мумкинлигини ёзмоқда.
