Қашқадарёда мактаб директори форма учун пул йиғмоқчи бўлди
Ҳолат юзасидан ММТБ расмий муносабат билдирди.
Ижтимоий тармоқда Қашқадарё вилояти Қарши шаҳрида мактаб директори мактаб формаси учун ўқувчилардан пул йиғиш бўйича кўрсатма бергани акс этган видеомурожаат тарқалмоқда. Ҳолатга вилоят мактабгача ва мактаб таълими бошқармаси расмий муносабат билдирди.
Ўтказилган ўрганиш жараёнида аниқланишича, мактаб директори F.Shuhratova ҳақиқатан ҳам 2025 йилнинг 21- январь куни мактабнинг Телеграм гуруҳига видеомурожаат қилиб, барча ўқувчиларга «жакет» олиниши мақсадида кўрсатма берган.
Натижада мактаб директори F.Sh. га нисбатан бошқарма бошлиғининг 2025 йил 22 январдаги тегишли буйруғига асосан ўртача ойлик иш ҳақининг йигирма беш фоиз миқдорида «Жарима» интизомий жазо чораси қўлланилган.
Шунингдек, мактаб жамоасига келгусида ушбу ҳолатларга йўл қўймаслик бўйича тушунтириш берилиб, мактаб синф раҳбарларидан тушунтириш хатлари олинган.
Таъкидланишича, таълим ташкилотида мажбурий тартибда ўқувчиларни форма кийишига доир пул маблағларини йиғиш, ташкил этиш, қатъиян тақиқланади.
