Қўқонда бир машина ноқонуний дорилар тўхтатиб қолинди
Улар Тошкентга сотиш мақсадида олиб кетилаётган бўлган.
Қўқон шаҳрида яшовчи шахс чет элда ишлаб чиқарилган жуда кўп миқдордаги дори воситаларини сотиш мақсадида Тошкентга олиб кетаётган вақтда қўлга тушди. Бу ҳақда Олий суд матбуот котиби Азиз Абидов маълум қилди.
Қайд этилишича, қўқонлик А.А. таниши Ф.М.дан чет элда ишлаб чиқарилган жуда кўп миқдордаги тиббий дори воситаларини олиб, ўз хонадонида сақлаб келган.
ДХХ ва Фарғона вилояти божхонаси ходимлари томонидан ўтказилган тезкор тадбирда М.Ж.нинг бошқарувидаги юк автомашинаси Данғара тумани Чағали қишлоғи ҳудудидан ўтган “Қўқон–Тошкент” автомобил йўли бўйлаб пойтахт томон кетаётган вақтда тўхтатилиб, кўздан кечирилди.
Мазкур юк автомашинасида А.А.га тегишли, ҳеч қандай ҳужжатлари бўлмаган 10 минг дона “Метрогил 100 мл” номли дори воситалари борлиги аниқланиб, ашёвий далил сифатида олинди. Шундан сўнг тадбир давомида унинг уйида сақланаётган хорижда ишлаб чиқарилаётган дорилар фош этилиб, тегишли ҳужжатлар расмийлаштирилди.
Далилий ашё сифатида олинган 23 турдаги дори воситалари давлат реестрида рўйхатга олинмаганлиги, мувофиқлик сертификатлари расмийлаштирилмаганлиги ҳамда сақлаш шароитига амал қилинмаганлиги маълум бўлди. Шунингдек, дориларни мамлакат ҳудудида сотиш, ташиш ва тиббиёт амалиётида қўллаш тақиқланганлиги бўйича хулоса берилган.
Жиноят ишлари бўйича Данғара туман суди томонидан А.А. 6 йилу 2 ой муддатга озодликдан маҳрум этилиб, суд залидан қамоққа олинди.
