Qoraqalpog‘istonda yirik ilmiy kashfiyot amalga oshirildi — Sulton Uvays tog‘larida taxminan 75 million yil avval yashagan dinozavrning toshga aylangan suyak qoldiqlari topildi.
Mazkur topilma O‘zbekiston Davlat geologiya muzeyi hamda Qoraqalpoq davlat universiteti olimlarining qo‘shma ekspeditsiyasi davomida aniqlangan. Tadqiqotchilarning ma’lum qilishicha, qazilmalar orasida qadimgi kaltakesakka oid umurtqa bo‘laklari, boldir suyagi va boshqa suyak qismlari topilgan.
Geologiya muzeyi direktori Ahmadjon Axmedshayevning so‘zlariga ko‘ra, topilgan qoldiqlar bo‘r davriga mansub bo‘lib, ularning aniq tasnifi xalqaro mutaxassislar ishtirokidagi laboratoriya tekshiruvlaridan so‘ng e’lon qilinadi.
Hozircha noyob namunalar ilmiy laboratoriyalarda puxta o‘rganilmoqda. Tadqiqot yakunida topilmaning dinozavrlar evolyutsiyasi tarixidagi o‘rni aniqlanishi kutilmoqda.