Қозоғистонда кузатилган чигирткалар босқини Ўзбекистонда ҳам кузатилиши мумкинми?
Қозоғистоннинг бир нечта ҳудудларида зарарли чигиртканинг “Италия пруси” тури тарқалган.
Қозоғистоннинг бир нечта ҳудудларида зарарли чигиртка босқини юз бергани акс этган ҳолатлар юзасидан воқеага ойдинлик киритиш мақсадида Ўсимликлар карантини ва ҳимояси агентлиги томонидан Қозоғистоннинг Қишлоқ хўжалиги вазирлиги Агросаноат мажмуасида давлат инспекцияси қўмитасининг Ўсимликлар ҳимояси бошқармаси ва Туркистон вилояти ҳудудий инспекцияси билан мулоқот олиб борилди.
Аниқланишича, жорий йилнинг 2 июль санасидан бошлаб Қозоғистоннинг Россия билан чегарадош бўлган Костанай вилояти Жангелди, Амангелди, Альтинсари ва Денисов туманлари ҳудудида зарарли чигиртканинг “Италия пруси” тури тарқалган. Натижада бугунги кунга қадар Костанай вилоятининг 260 минг гектар ҳудудида зарарли чигирткаларга қарши ишлов берилиб, вазият назоратга олинган.
Маъум қилинишича, Қозоғистоннинг Костанай вилояти Ўзбекистондан 2 000 – 2 200 километр узоқликда жойлашган бўлиб, бугунги кунда юқорида қайд этиб ўтилган зарарли чигирткалар тўдаси республик ҳудудига кириб келиш эҳтимоли кам.
