Ammo Qurvonali aka tayyorlagan palovni yeb, pulini to‘lashda esa, to‘g‘risi, uyalasiz. Bir kishilik to‘plam: o‘rtacha likopda no‘xatli, go‘shtli, ustida tuxumi bor osh, yarimta non, shakarob (to‘g‘ralgan piyoz, bodring va pomidor). Shularning hammasini bor-yo‘g‘i 6 ming so‘m evaziga xarid qilib, ishtaha bilan ovqatlanasiz. Ha, aytgancha, oshxonada choy mutlaqo bepul. Bloger Isroil Tillabev tomonidan Facebook sahifasida yaypanlik tadbirkor Qurvonali akaning oshi haqida joylangan video turli fikr-mulohazalarga sabab bo‘ldi. Ko‘plab kuzatuvchilar xuddi biz kabi bunday arzon osh borligiga ishonishmadi ham. Biz tadbirkor bilan suhbatlashib, buning qanchalar haqiqat ekaniga oydinlik kiritdik.
Mavzuni o‘rganish davomida ayni kunlarda palov uchun kerakli mahsulotlar (yog‘, go‘sht, sabzi)ning qimmatligi bois biz viloyatlar kesimida oshning narx-navosi bilan ham qiziqdik. Joriy yilning iyun oyida davlat statistika qo‘mitasi tomonidan mamlakatimizning markaziy hududlaridagi umumiy ovqatlanish muassasalari (osh markazlari)da o‘tkazilgan kuzatuv natijalariga ko‘ra , eng arzon osh Namanganda 14 714 so‘m deya qayd etilgan. Biz so‘z yuritayotgan va qo‘mita ro‘yxatiga kirmay qolgan osh haqiqatdan ham Farg‘ona viloyatining Yaypan shahrida tayyorlanar ekan. Yaypanliklar bir porsiya oshni 6 ming so‘mga sotib olishadi.
Tadbirkor Qurvonali aka o‘z xonadonida oshxona ochib, 35 yildan buyon ota kasbini davom ettiryapti. U o‘zining manfaatidan ko‘ra, aholining “cho‘ntagi”ni o‘ylaydi. Odamlarni rozi qilishdek oliyjanoblikni maqsad qilgan.
—Oilada kenjatoy — 12-farzandman. Aka-opalarimning deyarli hammasi oliy maʼlumotli. Men oshpazlikka qiziqib, ayolim bilan uzoq yillardan beri faoliyatimni davom ettirib kelyapman. Avvaliga oshxonamizni uyimizda ochdik. Mijozlar ko‘payib, ularni sig‘dirolmay qoldik. Bir yil avval tumanimiz markazidagi Avtovokzal yonidan ijaraga joy oldik. Hozirda 5 nafar ishchimiz bor, ularning 4 nafari ayollar. Xodimlarimizga har oyda 1 million 500 ming so‘mdan maosh to‘layman. Undan tashqari, bitta shogirdim bor. Unga kuniga 100 ming so‘m haq to‘layman. Shogirdim chet elga ketmoqchi edi, uni bu fikridan qaytardim. Chunki begona yurtda qiynalib topayotgan pulni shu yerda, ota-onasi bag‘rida ham topsa bo‘ladi. Shukr, hozir u ham topayotgan oyligidan mamnun bo‘lib ishlayapti. Xodimlarimizning hammasi bilan mehnat shartnomasi tuzilgan. Ijara uchun oyiga 2 yarim million so‘m to‘layman. Ishchilarimiz maoshi va boshqa sarf-harajatlardan tashqari oyiga 3 yarim million so‘m atrofida sof daromad olaman. Kuniga o‘rtacha 300-350 nafar atrofidagi mijozlarga xizmat ko‘rsatamiz. Bizda osh arzonligiga baʼzilar ishonmay, o‘zlari ko‘zi bilan ko‘rib, ishonch hosil qilgani kelib, mehmon bo‘lib ketishadi. Ko‘pchilik sabzi, yog‘ qimmatlab ketdi, nega narxni o‘zgartirmadingiz, deb ko‘p aytdi. Ammo bugun men osh narxini oshirganim bilan bozordagi narx-navo har doim birdek turmaydi-ku, ertaga tushib ketishi ham mumkin. Buning menga u qadar ahamiyati yo‘q. Odamlar rozi bo‘lsa, bo‘lgani. Nolimayman, ro‘zg‘orim but. Ishimni yaxshi ko‘raman. Faoliyatim orqasidan 4-5 ta oilaga baraka kiryapti. Shuni o‘zi yetarli, aslida. Kelajakda faoliyatimizni yana-da kengaytirib, odamlarga xizmat qilib, yurtimiz ravnaqiga hissa qo‘shishni niyat qilganmiz.
Jamiyatimizda mana shunday o‘z ishini sevib, xalqning duosi va olqishi orqali ro‘zg‘orini tebratayotgan diyonatli insonlar ko‘p. Oshxona biznesini yo‘lga qo‘yib, adashib kirgan xo‘randalar hisobiga boylik orttirishni ko‘zlaganlar Qurvonali akadek insonlardan o‘rnak olsa qaniydi.
Bahriniso MADUMAROVA