ПСЖ Чемпионлар лигасида кетма-кет иккинчи бор ғолиб бўлди

Франциянинг “Пари Сен-Жермен” (ПСЖ) клуби УЭФА Чемпионлар лигасининг навбатдаги мавсумида ҳам бош совринни қўлга киритди. Парижликлар финал учрашувида Лондоннинг “Арсенал” жамоасини пенальтилар сериясида мағлуб этиб, кетма-кет иккинчи марта Европанинг энг нуфузли клуб турнири ғолибига айланди.

 

Ҳал қилувчи баҳс кескин курашлар остида ўтди. Учрашувнинг 6-дақиқасидаёқ “Арсенал” ҳужумчиси Кай Ҳавертс ҳисобни очиб, инглиз клубини олдинга олиб чиқди.

 

ПСЖ иккинчи бўлимда мувозанатни тиклашга муваффақ бўлди. 65-дақиқада Усмон Дембеле Хвича Кваратсхелияга нисбатан ишлатилган қоида бузилиши учун белгиланган пенальтини аниқ амалга ошириб, ҳисобни тенглаштирди.

 

Асосий ва қўшимча бўлимларда ғолиб аниқланмагач, финал тақдири пенальтилар сериясида ҳал бўлди. Бу сафар ПСЖ футболчилари аниқроқ ҳаракат қилиб, 4:3 ҳисобида устун келди.

 

Маълумот учун, Чемпионлар лигаси ва Европа чемпионлари кубоги тарихида финал учрашуви 11 марта пенальтилар сериясигача етиб борган.

 

Ўтган мавсумда ҳам ПСЖ тарихида илк бор Чемпионлар лигаси бош совринини қўлга киритган эди.

 

Парижликлар финалда Миланнинг “Интер” клубини 5:0 ҳисобида мағлуб этиб, турнир финаллари тарихидаги энг йирик ғалабалардан бирига муаллифлик қилганди.

 

Шунингдек, ПСЖ жорий мавсумда кетма-кет бешинчи бор Франция Биринчи лигаси чемпионлигини ҳам қўлга киритди.