Prezident Administratsiyasi rahbari Saida Mirziyoyeva Samarqand Kongress markazida suv resurslaridan samarali foydalanish va suv sifatini oshirish masalalariga bag‘ishlangan muloqotda ishtirok etdi. Unda suv sarfini maqsadli taqsimlash, yangi texnologiyalarni joriy etish va qishloq xo‘jaligida suv tejamkor mexanizmlarni qo‘llash bo‘yicha tashabbuslar taqdim qilindi.
Muloqotda kanallarni betonlash, suv oqimini raqamli boshqaruv orqali nazorat qilish, kichik gidroelektr stansiyalar (GES) qurish kabi takliflar muhokama qilindi. Mirziyoyeva ushbu loyihalar aholining hayotiy ehtiyojlarini ta’minlash va fermer xo‘jaliklarini qo‘llab-quvvatlashga xizmat qilishini ta’kidladi.
Shuningdek, Saida Mirziyoyeva Samarqandda yangidan ochilishi rejalashtirilayotgan Bolalar kutubxonasi konsepsiyasi bilan tanishdi. Mazkur kutubxona 1911-yilga oid tarixiy binoda joylashadi va restavratsiya jarayonida uning madaniy qiyofasi ehtiyotkorlik bilan saqlab qolinishiga e’tibor qaratiladi.
Kutubxona bolalar, o‘smirlar va ularning ota-onalari uchun ijodiy maskanga aylanishi kutilmoqda. Loyihada ko‘zi ojiz va zaif ko‘ruvchi bolalar uchun audiofond tashkil etilishi, shuningdek, kutubxona fondi 120 mingdan ortiq kitobni o‘z ichiga olishi rejalashtirilgan.