Samarqandda aroqdan zaharlanish oqibatida 5 nafar erkak vafot etdi. Bu haqida Bosh prokuratura matbuot xizmati maʼlum qildi.
Qayd etilishicha, qo‘lbola usulda tayyorlangan spirtli ichimlik mahsulotlarini sotgan shaxsga nisbatan jinoyat ishi qo‘zg‘atilgan.
Gumonlanuvchiga nisbatan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) 4-qismi “a” bandi bilan jinoyat ishi qo‘zg‘atilgan.
Hozirda tergov harakatlari olib borilmoqda.
Vafot etgan shaxslar shaharning turli mahallalarida yashovchi 63, 50, 72, 39 va 56 yoshdagi erkaklar bo‘lib, to‘rt nafari o‘z yashash xonadonida, yana biri shifoxonada 11 yanvar kuni vafot etgan. Aksariyati spirtli ichimlikka ruju quygan shaxslar bo‘lgan.
Marhumlarning o‘limi sabablarini aniqlash maqsadida sud-tibbiyot hamda kimyoviy ekspertizalar tayinlangan.