Самарқандда беш киши ароқдан заҳарланиб вафот этди
Қўлбола ароқ сотган шахсга жиноят иши қўзғатилди.
Самарқандда ароқдан заҳарланиш оқибатида 5 нафар эркак вафот этди. Бу ҳақида Бош прокуратура матбуот хизмати маълум қилди.
Қайд этилишича, қўлбола усулда тайёрланган спиртли ичимлик маҳсулотларини сотган шахсга нисбатан жиноят иши қўзғатилган.
Гумонланувчига нисбатан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) 4-қисми «а» банди билан жиноят иши қўзғатилган.
Ҳозирда тергов ҳаракатлари олиб борилмоқда.
Вафот этган шахслар шаҳарнинг турли маҳаллаларида яшовчи 63, 50, 72, 39 ва 56 ёшдаги эркаклар бўлиб, тўрт нафари ўз яшаш хонадонида, яна бири шифохонада 11 январь куни вафот этган. Аксарияти спиртли ичимликка ружу қуйган шахслар бўлган.
Марҳумларнинг ўлими сабабларини аниқлаш мақсадида суд-тиббиёт ҳамда кимёвий экспертизалар тайинланган.
