Сирдарёда адвокат 5500 доллар пора билан қўлга тушди
У гумонланувчи фуқаронинг ишини судда "ижобий ҳал қилиш" ва унинг сақлаш жойини ўзгартиришни ваъда қилган.
Давлат Хавфсизлик Хизмати (ДХХ) ва Прокуратура органлари ходимлари томонидан ўтказилган тезкор тадбир давомида, Сирдарё туманидаги адвокатлик бюроси адвокатининг ноқонуний фаолиятига чек қўйилди.
Аниқланишича, ушбу адвокат ўз хизмат мавқеидан фойдаланган ҳолда, туман Ички ишлар бўлими (ИИБ) ҳузуридаги Тергов бўлими иш юритувида бўлган жиноят иши бўйича гумонланувчи тариқасида жалб қилинган фуқаронинг ишини “ижобий ҳал қилиб бериш” эвазига пул талаб қилган.
Хусусан, айбланувчи фуқарони Ховос туманидаги 8-сон Тергов ҳибсхонасидан Сирдарё туман ИИБ вақтинчалик сақлаш ҳибсхонасига ўтказиш ҳамда кейинчалик жиноят ишини судда унинг фойдасига ҳал қилиб бериш мақсадида, адвокат 5500 АҚШ доллари миқдоридаги пул маблағларини талаб қилган.
Тезкор тадбир натижасида адвокат талаб қилинган сумманинг бир қисми – 4500 АҚШ доллари ва 6 миллион сўмни олаётган вақтида ашёвий далиллар билан қўлга олинди.
Ушбу адвокат гумонланувчининг ҳуқуқларини ҳимоя қилиш мақсадида давлат ҳисобидан юридик ёрдам кўрсатиш учун жалб қилинган эди. Бу эса унинг ўз адвокатлик қасамёди ва касбий мажбуриятларига нисбатан хиёнат қилганини англатади.
Ҳозирда мазкур шахсга нисбатан Ўзбекистон Республикаси Жиноят Кодексининг 168-моддаси 3-қисми “в” банди ва 28, 211-моддаси 1-қисми билан жиноят иши қўзғатилиб, тергов ҳаракатлари олиб борилмоқда.
