Toshkent xalqaro aeroportida noqonuniy olib o‘tilgani sabab hayvonot bog‘iga vaqtincha saqlash uchun topshirilgan timsoh bolalari va buqalamundan 1 bosh timsohcha hamda 6 bosh buqalamun nobud bo‘ldi. Bu haqda Davlat bojxona qo‘mitasi matbuot xizmati xabar berdi.
Eslatib o‘tamiz, 30 avgust kuni Toshkent aeroportida bojxonachilar tomonidan timsoh bolalarining noqonuniy olib o‘tilishining oldi olingandi. Holatga oydinlik kiritilguniga qadar ushbu yovvoyi hayvonlar Toshkent hayvonot bog‘iga vaqtincha saqlash uchun topshirilgan. Qo‘mita xodimlari Toshkent hayvonot bog‘iga borib, jonivorlarning hozirgi holatini tekshirgan. Ular timsohchalar hayvonot bog‘i ekspozitsiyasida tashrif buyuruvchilar eʼtiboriga havola qilinayotganini ko‘rgan.
«Yovvoyi tabiatdan ajratib olingani sababli timsoh bolalarining barchasi ham birdek xonaki sharoitga moslashganicha yo‘q. Ularning ayrimlari mustaqil ravishda oziqlana olmayapti. Shuningdek, hamon maxsus karantinda saqlanayotgan buqalamunlarning ahvolini ham yaxshi deb bo‘lmaydi. Ular qutida mevalar orasida olib kelingani sababli parvoz vaqtida mevalar ichida siqilib qolib, jiddiy shikast yegan», — deyiladi qo‘mita xabarida.
Oqibatda, hozirga kelib 1 bosh timsohcha va 6 bosh buqalamun nobud bo‘lgan, hozirda ular utiliziatsiyaga qadar maxsus muzlatkichda saqlanmoqda.
Maʼlumot uchun: O‘zbekiston faunasida Nil timsohlari va Yaman buqalamunlari uchramasligi sababli ular mamlakat «Qizil kitob»iga kiritilmagan. Ammo «Xalqaro qizil kitob»idan joy olgan. Shu sababli Xalqaro savdo qilish konvensiyasiga muvofiq yo‘q bo‘lib ketish xavfi ostidagi yovvoyi fauna va flora turlarini respublikaga olib kirishda CITES maxsus ruxsatnomasi kerak.
«Biroq O‘zbekiston Ekologiya va atrof-muhitni muhofaza qilish davlat qo‘mitasidan olingan maʼlumotlarga ko‘ra, bunday ruxsatnoma olish uchun murojaat kelib tushmagan. Jonivorlarning keyingi taqdiri sud hukmiga binoan hal bo‘ladi», — deyiladi xabarda.
Holat yuzasidan bojxona organlari Jinoyat kodeksining bir nechta moddalari bilan jinoyat ishi qo‘zg‘atgan.