Ayrim ijtimoiy tarmoqlarda “Mana nega havo zaharlandi” sarlavhasi ostida Toshkent IES tomonidan poytaxt havosining ifloslanishi haqida video tarqatilmoqda. Ushbu video qariyb 2 yil oldin – 2024-yil fevral oyida olingan bo‘lib, bugungi kunga mutlaqo mos kelmaydi. O‘sha paytda stansiyada asosiy yoqilg‘i tabiiy gazdan, zaxira yoqilg‘i sifatida esa qisqa muddat mazutdan foydalanilgan.
Hozirda Toshkent IESda o‘rnatilgan “Yengil filtr” qurilmasi chiqindilarni 99,5 foiz samara bilan tozalaydi va havoga tashlanadigan qattiq zarrachalar konsentratsiyasini 100 mg/m³ dan 6 mg/m³ gacha kamaytiradi. Stansiyada tutun gazlari tarkibi yuqori aniqlikda nazorat qilinadi va real vaqt rejimida Ekologiya va iqlim o‘zgarishi milliy qo‘mitasining Situatsion markaziga uzatiladi.
Shuningdek, stansiyaning sanitariya-himoya hududida zamonaviy ekopost o‘rnatilgan bo‘lib, u atrof-muhit holatini doimiy nazorat qilish va ekologik ko‘rsatkichlarni tezkor monitoring qilish imkonini beradi.
Joriy kuz-qish mavsumi davomida mazut yoqilg‘isidan foydalanilmagan va stansiya tabiiy gaz asosida ishlamoqda.