Тошкентда 20 ёшли йигит лезвия билан қорнини кесиб ташлади
Ҳолат Чилонзор тумани ИИБ ҳовлисида юз берган.
Ижтимоий тармоқларда Тошкент шаҳрида бир фуқаро ўзига-ўзи тан жароҳати етказганлиги акс этган видео тарқалмоқда. Ҳолат юзасидан шаҳар ИИББ расмий муносабат билдирилди.
Қайд этилишича, 25 март кечаси Чилонзор туманида бир нечта фуқаролар ўзаро жанжаллашиб жамоат тартибини бузганлиги ҳақида хабар келиб тушган. Воқеа жойига зудлик билан етиб борган туман ИИО ФМБ ходимлари 7 нафар фуқарони тинчлантириб, тегишли ҳужжатларни расмийлаштириш учун яқин орадаги ИИБга бораётган вақтида ички ишлар органлари ходимларининг қонуний талабини бажармасдан, уларга фаол қаршилик кўрсатган. Ушбу фуқароларнинг айримлари номаълум моддадан мастлик ҳолатида бўлган.
Ҳолат юзасидан фуқароларга нисбатан Ўзбекистон Республикаси Маъмурий жавобгарлик тўғрисидаги кодекснинг 183-моддаси ("Майда безорилик"), 194-моддаси билан маъмурий баённома расмийлаштирилган.
26 март куни ушбу фуқароларни судга олиб бориш учун чақиртирилган вақтда Чилонзор тумани ИИО ФМБ ҳовлисида муқаддам Жиноят кодексининг 277-моддаси билан икки маротаба судланган, Маъмурий жавобгарлик тўғрисидаги кодекснинг бир нечта моддалари билан маъмурий жавобгарликка тортилган 20 ёшли Ш. А. жавобгарликдан қутулиш мақсадида намойишкорона кўйлагини ечиб оғзида бўлган писка (лезвия) бўлаги билан қорин ва қўл қисмини енгил кесиб ўзига ўзи тан жароҳати етказган. ИИО ходимлари томонидан тезкорлик билан кўрилган чоралар натижасида фуқародан лезвия олиб қўйилиб, оғир оқибатларнинг олди олинган.
Ш. А. га зудлик билан биринчи ёрдам кўрсатилиб, тиббиёт муассасасига олиб борилган. Унга тиббиёт ходимлари томонидан тиббий ёрдам кўрсатилганидан сўнг Ш. А. шу куннинг ўзида уйига кетган. Тиббий маълумотга кўра Ш. А. га "Қорин олд деворининг кесилган жароҳатлари, чап қўл билак соҳаси кесилган жароҳати” ташхиси қўйилган.
Фуқаро Ш. А. ўзига ўзи тан жароҳати етказганлиги ҳолати туман прокуратураси томонидан ўрганилмоқда.
