Тошкентда йирик тиббий дастур ташкил этилмоқда
Қарийб 100 нафар бола Қирол Салмон ёрдамида бепул операция қилинади.
Академик В. Воҳидов номидаги Республика ихтисослаштирилган хирургия илмий-амалий тиббиёт маркази Қирол Салмон гуманитар ёрдам маркази ҳамда Ислом олами лигаси кўмагида йирик тиббий дастур ташкил этмоқда.
Унга кўра, 200 нафарга яқин туғма юрак нуқсони бўлган болалар тиббий кўрикдан ўтказилиб, қарийб 100 нафарида хайрия жарроҳлик амалиётлари бажарилади.
Саудия Арабистонидан ташриф буюрган 30 нафар малакали шифокор 7 кун давомида очиқ ва эндоваскуляр операцияларни амалга оширади.
Мазкур ташаббус юқори технологияли жарроҳлик ёрдамига муҳтож бўлган болалар учун улкан имконият яратиши билан бирга, маҳаллий мутахассисларнинг халқаро тажрибани ўрганиши ва ўз малакасини оширишига хизмат қилади.
Маълумот учун: бу иккинчи тиббий дастур бўлиб, биринчиси ўтган йили ўтказилган ва 100 нафарга яқин катталарда жарроҳлик амалиётлари бажарилган.
Республика ихтисослаштирилган хирургия илмий-амалий тиббиёт марказида бўлиб ўтган йиғилишда ушбу ташаббус тафсилотлари муҳокама қилинди.
